Pro le octave vice, alumnos del Universitate de Granada studia interlingua intensivemente.

UMIUniversitate de Granada  Durante tote le mense de novembre, le Universitate de Granada in le sud de Espania repete su curso de interlingua.

"Introduction al interlinguistica. Interlingua parlate e scribite" es le titulo del curso, arrangiate al universitate del 9 al 27 de novembre per le Departimento de Didactica e Organisation Scholar sub direction de Francisco Salvador Mata e Hermenegildo de la Campa Martínez, ambes diligente autores de publicationes in e super interlingua.

Es le octave anno que le curso de 30 horas es offerite. Il ha spatio pro 30 alumnos. Le cursos pote esser recognoscite como creditos de libere configuration.

Durante le curso le alumnos apprende interlingua e como usar lo in practica. Illes debe i.a. practicar conversation in le lingua, planificar actiones pro promover interlingua, leger e rediger textos in interlingua e analysar linguisticamente altere textos in le lingua. Normalmente le curso comprehende anque le traduction in interlingua de un obra plus grande.