Le ultime duo editiones del Panorama anno 2009 es in retardo. Le imprimeria ha claudite.

UMIPanorama in interlingua  Le abonatos del Panorama in interlingua ha reguardate in le cassa postal in van durante le passate septimanas, ma le duo ultime editiones del magazin solmente veni ora - in grande retardo.

Le ration es que le imprimeria in Nederland, que durante omne le 22 annos que Panorama ha existite, ha imprimite le magazin, debeva clauder in novembre. Assi le impression del editiones septembre-octobre e novembre-decembre non esseva facite in tempore.

Durante iste dies, le edition septembre-octobre finalmente arriva a omne abonatos in cinque continentes, e intra al maximo ancora un septimana - in bon tempore ante Natal - venira le edition novembre-decembre.

22 annos con Panorama

Le Union Mundial pro Interlingua (UMI) regretta que le crise financiari assi causava le clausura del imprimeria Drukkerij Goudkuil, que ha imprimite e expedite Panorama desde le prime edition in januario-februario 1989. Le imprimeria esseva fundate per Frits Goudkuil (1917-2007), interlinguista durante multe annos, como le Servicio de Libros UMI, e desde le annos 1970 le imprimeria ha producite e vendite numerose libros in interlingua. Le filio de Frits Goudkuil, Frank, assumeva le gerentia del imprimeria ante le morte de su patre.

Le UMI ha succedite facer imprimer le edition novembre-decembre in maniera alternative, e assi illo sperabilemente attingera omnes ante Natal.

Deveni abonato digital

Un nove imprimeria essera trovate ante le publication de Panorama in 2010, ma le Consilio Executive del UMI incoragia de novo omnes a usar le offerta de devenir abonato digital. Assi on non solmente recipe le magazin plus rapidemente - e in colores -, on anque sparnia CO2 e moneta, pois que le abonamento digital costa solmente 10 euros pro anno contra le 15 euros pro un abonamento sur papiro. Abonatos digital recipe Panorama in lor cassa postal electronic como un file personal de PDF.