Famose manual publicate in anglese
Le manual le plus traducite in le mundo - un curso classic de interlingua - finalmente appare in anglese como un belle presente de Natal.
Le version anglese del famose manual "Interlingua - instrumento moderne de communication international" ha finalmente apparite.
Le manual, scribite per fil. mag. Ingvar Stenström de Svedia, es le manual le plus traducite in le mundo. Per le version anglese illo ha apparite in 13 linguas, e plure versiones es sub preparation.
Un sensation in le scholas
Le famose curso de 30 lectiones appareva pro le prime vice in 1972, publicate per Esselte Studium, le casa editorial le plus grande de materiales pro le inseniamento in Scandinavia. Le curso esseva elaborate pro usar in le gymnasios svedese in le disciplina "Cognoscentia lingual general", ubi le alumnos debe apprender maestrar le parolas estranier in svedese. In vice de apprender passivemente tractos grammatic e lingual de greco ancian e latino, Ingvar Stenström dava al alumnos sapientia active. Le vocabulario international de interlingua consisteva de exactemente le mesme partes, ma ora le alumnos apprendeva in ultra un lingua international que illes poteva usar activemente in tote le mundo pro communication international.
Le introduction de interlingua in plure gymnasios in iste maniera deveniva un sensation, e le inseniamento de interlingua ha continuate durante decennios.
Compra lo directemente in Internet
Le curso consiste de 30 lectiones, primarimente super le copula charmante Hugo e Anna, e un parte con Commentarios. Le version anglese combina le duo partes in un volumine, como esseva le original version svedese. Ph.D. Catriona M. Chaplin ha traducite e adaptate le curso a anglophonos.
Le libro ha 150 paginas e es bellemente illustrate per le illustrationes original (in ambe sensos del parola) per Lennart Jäger.
On pote comprar e pagar lo directemente in Internet pro 10,48 euros per Lulu.com. Le adresse directe es http://www.lulu.com/product/paperback/interlingua---instrumento-moderne-de-communication-international-(english-version)/6103339
Le curso in multe altere libros es vendite per le Servicio de Libros UMI