Interlingua habeva su proprie stand durante le feria le plus grande de libros in Scandinavia que quasi 100.000 visitava.

UMIBok & Bibliotek  Milles de personas apprendeva de interlingua durante le feria le plus grande de libros in Scandinavia le passate fin de septimana in Svedia.

Quasi 100.000 personas ab multe paises, i.a. alcun laureatos del premio Nobel e probabilemente alcun premiatos futur, visitava le grande ferie "Bok & Bibliotek" (Libro & Bibliotheca) in Göteborg al costa west de Svedia le 22-26 de septembre 2010. Le Societate Svedese pro Interlingua (SSI) ha presentate interlingua de su proprie stand in le grande feria con un area de exposition de 13.257 metros quadrate.

Traffico vivide de interessatos
Le stand del SSI esseva elaborate per Nils Kangas in cooperation con Barbara Rubinstein, Inger Olsson e Esko Kangas (sur le photo a dextere in le stand). Illo assi anque esseva parte del catalogo official e le sito official del feria.

"Multe personas stoppava a nostre stand e demandava re interlingua. Post nostre information le plus de personas ha admittite que interlingua deberea poter haber un function vital. Specialmente le grammatica facilemente apprendite imponeva le visitatores qui sovente rememorava lor luctas con grammatias in le schola, e pro multe personas le vocabulario pareva esser comprensibile a prime vista," narra Erik Enfors, vice-secretario del SSI.

Le stand presentava un ample selection de litteratura, libros e magazines in interlingua. Specialmente le grande dictionario svedese-interlingua per Pian Boalt imponeva multes.

Interviews super interlingua
Alumnos de un schola de inseniamento pro adultos habeva obtenite le carga scriber un articulo super un exposition in le ferie, e un juvene femina decideva scriber super interlingua. Illa faceva multe interviews durante le exposition.

"Tres policieros anque esseva multo interessate e se demandava si interlingua potera esser apte in lor labor, in le qual illes sovente es fortiate parlar con personas ab multe paises. Illes habeva experientiate que non omne estranieros comprende anglese," surride Erik Enfors.

Le SSI ha essite presente durante alcun del ferias passate ma alora sin un stand. In vice on ha distribuite materiales informative super interlingua.

Le proxime "Bok & Bibliotek" habera loco in Göteborg le 22-25 de septembre 2011.

Audi plus: Ascolta le interview in Radio Interlingua con le vice-secretario del Societate Svedese pro Interlingua, Erik Enfors, super le resultatos del feria pro interlingua

Lege plus: Le stand del Societate Svedese pro Interlingua in le catalogo official del ferie (in svedese)