Le nove sito del UGI debe promover interlingua in le mundo germanophone.

UMI  Le Union German pro Interlingua (UGI) es ora officialmente presente in Internet.

Al adresse www.interlinguaunion.de le sito communica super interlingua e su possibilitates al mundo germanophone. Germano es le lingua le plus grande in le Union Europee.

Le sito presenta ante toto le 19ne conferentia international de interlingua in Bulgaria in julio. In ultra il ha un mini-curso de interlingua, un presentation pro juvenes, un offerta de traductiones professional in interlingua e le possibilitate de inscriber se pro cursos de interlingua in Germania.

"Lernen Sie Interlingua - kommunizieren Sie mit 600 Millionen Menschen" (apprende interlingua - communica con 600 milliones de homines), se dice sur le prime pagina.

Le Union German pro Interlingua esseva fundate durante le 18ve conferentia international de interlingua in Kirchheimbolanden, Germania. Le presidente es Sven Frank, qui anque es le presidente del Union Mundial pro Interlingua. Harald Schmidt-El Khaldi es le vicepresidente e membro pro le UGI del Consilio General del UMI, e Manfred Magin es le tresorero.

Le Union German pro Interlingua ora ha essite addite al lista de adresses in Internet, ubi on pote trovar interlingua. Studia le lista in le Ligamines.

Union German pro Interlingua