Emission numero 31 narra del conferentia international in Bulgaria in julio e portraita le redactor del Panorama in interlingua.

UMIRadio Interlingua  Le 31me podcast de Radio Interlingua es in-linea!

Primo illo vole avisar super le data final de inscriber se al 19ne conferentia international de interlingua in Chepelare, Bulgaria. A saper: illo es le 1 de maio. Que vos vos inscribe si tosto como possibile pro un septimana agradabile inter le montanias bulgare. Radio Interlingua essera presente e vole incontrar su ascoltatores tamben personalmente!

Vos ja multe vices poteva ascoltar le contributiones del interlinguista active Thomas Breinstrup de Danmark. Ma esque vos ja pensava, que il esserea bon cognoscer le plus - saper plus super ille? A isto vos adjuta le interview con ille, facite al 11me incontro nordic de interlingua in Linköping, Svedia, 2008. In iste prime parte del interview se crea un situation rarissime, quando on non le audi parlante super interlingua, proque le redactor Péter Kovács le demandava definitivemente super su altere hobbys (e su profession, familia).

Iste vice le musicas veni del musico hungare Gábor Rezes, qui habita in Keszthely - un urbe hungare al ripa del famose laco Balaton. Ille sona un instrumento multo ancian, le koboz o cobza, que es un variante folkloric del lut medieval. Olim iste typo simplificate del lut era divulgate in tote le Hungaria historic, ma hodie illo superviveva solo in le provincia Moldova de Romania, ubi lo usa hungaros, rumanos e tsiganos (providente le musica pro ambe le populos).

Le sonoritate del cobza es multo ancian e simile al sonoritate del instrumentos parente como le dombra al kazakhos e altere tal instrumentos parente in le ambiente centro-asiatic e caucasian. Primo vos potera ascoltar un composition traditional in le stilo hungare de Moldova, ma le secunde pecia musical de Gábor Rezes prova, que on pote sonar musica moderne tamben per iste instrumento ancian.

Radio Interlingua publica cata mense un nove emission totalmente in interlingua sub le redactorato de Péter Kovács, Hungaria, qui in augusto 2008 assumeva le carga. Le emissiones ha devenite multo popular. Milles de personas los discarga in formato MP3 o ascolta directemente in www.interlingua.com/radio.