Presentationes in interlingua augmenta le mercato grandemente e da accesso a milliones de nove personas.

UMI  Le uso de interlingua in circulos commercial deveni sempre plus marcante. Plure firmas ha decidite presentar lor servicios in interlingua pro assi attinger un publico plus mundial.

Interlingua esseva ja immediatemente post su apparition in 1951 usate pro summarios medical e scientific. Desde alora illo ha essite usate pro summarios e presentationes in discos de musica, libros e magazines professional.

Multe firmas totevia anque usa interlingua pro presentar se. Isto significa que multe milliones de personas pote orientar se super lor productos e servicios e que on assi obtene un mercato multo plus grande.

Le firma bulgare, Sigilla, es le plus recente a presentar su servicios in interlingua. Sigilla es gerite per le ex-secretario general del Union Mundial pro Interlingua, Petyo Angelov, qui es le organisator in chef del 19ne Conferentia International de Interlingua in Chepelare in le fin de julio. Sigilla offere education per le systema Inductio Directa, un combination de un education strictemente individual e del ultime successos del linguistica applicate. In ultra, illo offere traductiones de documentos. Ja al prime pagina on vide un logo marcante dicente "Iste sito ha version in interlingua – Clicca hic". Visita mesme le sito in www.sigilla.com/index_in.php.

Un altere exemplo es le firma polonese Eurointerservis. Gerite per Tomasz Kubiczek, magistro in economia e magistro in derecto de administration, illo offere "experientia in le stabilimento, disveloppamento, trainamento e promotion de commercio e cooperation international intra Europa". Tote le presentationes es in interlingua como uno de un manata de linguas de presentation. Visita le sito: www.eurointerservis.eu.

Le Servicio de traductiones del Union Mundial pro Interlingua (www.interlingua.com/traductiones) ha assistite in le projecto. Illo offere a firmas e organisationes traductiones de contento limitate gratuitemente de sitos web, articulos scientific, manuales, communicatos de pressa etc.

Sigilla