Prime reportos del conferentia in le montes bulgare
Visita le pagina official del 19ne Conferentia International de Interlingua
Il habeva grande activitate de matino a nocte durante le conferentia international de interlingua in Bulgaria le 23-30 de julio. Mesmo durante le mangiar (a sinistre) initiativas e planos esseva discutite. Photo: Thomas Breinstrup
Durante un tote septimana participantes de tote le mundo se ha amusate e collaborate super le futuro de interlingua durante le 19ne Conferentia International de Interlingua in Bulgaria.
Le silentio esseva absolute, quando a 10.00 horas precisemente venerdi antemeridie comenciava le prime examine de interlingua in le grande sala del 19ne Conferentia International de Interlingua in le citate montan Chepelare in le sud de Bulgaria.
E assi comenciava le ultime plen die del programma intense de un septimana plen de experientias, excursiones, amusamento, discussiones seriose, labor in gruppos e - ante toto - multissime conversationes amical de matino a nocte.
Alte humor e bon energia
Le participantes de multissime nationes in plure continentes ha gaudite de un septimana de bon tempore: sol ma non troppo de calor a causa del montes, que faceva le 19ne conferentia le conferentia le plus alte in le historia de interlingua. Gratias al organisatores del Academia Interlinguistic Bulgare, toto ha functionate perfectemente, e mesmo si le viages in autobus pro le attractiones esseva a vices longe, illos valeva le pena: Cavas e cavernas phantastic se revelava pro le participantes, qui anque visitava un ancian monasterio historic in le region multo verde e montaniose.
Desde le presidente del Union Mundial pro Interlingua, Sven Frank, e le secretario general del UMI, Carlos Soreto, dominica aperiva le conferentia, le humor ha essite alte e le energia equalmente, durante que on ha laborate intensivemente in le elegante sala conferential e sur le terrassa minus calide al parve tabulas. On ha discutite ante toto como facer interlingua avantiar e diffunder se ancora plus, e il ha habite un intense labor de traduction de textos in interlingua pro varie sitos in Internet. Ma le labor non sempre esseva si seriose; il ha i.a. habite tempore pro facer numerose registrationes de films - parve presentation de interlingua in le multe linguas national e mesmo un parve comedia in interlingua.
Nove futuro pro www.interlingua.com
Omne le resultatos va monstrar se poco a poco ci in www.interlingua.com.
E naturalmente anque justo www.interlingua.com esseva le centro de plure sessiones, ubi on discuteva como le porta principal a interlingua pote presentar se plus professionalmente e plus clarmente, assi que illo deveni sempre plus attractive, e assi que il essera plus facile a trovar le numerose offertas que le sito ja ha.
Durante tote le septimana, il ha habite cursos pro le comenciantes sub guidantia del sorores francese, Alix Mahé-Potet e Madeleine Mahé. Post cata lection le participantes ha exite con grande surrisos in le facie. Mesmo si on labora, on pote amusar se, como omnes ha facite in bon compania durante tote le septimana.
Edition conferential de Panorama
Le Panorama in interlingua dedicara tote le edition de septembre-octobre al 19ne conferentia international de interlingua con reportages, novas, notitias e, naturalmente, multissime photos del grande evento que multes ha sequite de distantia - o per le multissime salutes de tote le mundo o per i.a. le prime transmission directe per Internet de un conferentia de interlingua.
Le 19ne conferentia essera claudite venerdi postmeridie - ante le grande festa iste vespere.