Chepelare
Visita le pagina official del 19ne Conferentia International de Interlingua

Pro le prime vice un station de radio anque monstra picturas vivente.

UMIRadio Interlingua  Radio Interlingua continua surprender - iste vice per presentar se con video.

In le secunde reporto del 19ne Conferentia International de Interlingua in Bulgaria iste julio, le ascoltatores seque de novo le redactor, Péter Kovács, e su microphono, durante que ille face su observationes e interviewa le participantes.

Iste 38ve emission presenta un mini-interview con le interlinguista danese, Lars Rosenmeier, qui gere le foro in interlingua Interforo. Le prime parte esseva audibile in le previe emission. Pois seque un interview con duo jornalistas - Donald Gasper de Hongkong e Thomas Breinstrup de Danmark. Illes explica proque interlingua e le conferentia es si interessante pro illes. Péter Kovács faceva le registration del interview per su camera photographic, dunque le film con le interview pote esser vidite anque, si on non vole "solmente" audir lor responsas como audio.

Como sempre, le emission de Radio Interlingua anque contine musica.

Radio Interlingua publica cata mense un nove emission totalmente in interlingua sub le redactorato de Péter Kovács, Hungaria, qui in augusto 2008 assumeva le carga. Le emissiones ha devenite multo popular. Milles de personas los discarga in formato MP3 o ascolta directemente in www.interlingua.com/radio. Ci on trova anque omne le previe emissiones de Radio Interlingua.