Le municipio de Tjörn
Tjörn es le sexte grande insula in Svedia e le centro del 13tie incontro nordic de interlingua in julio 2012. Le municipio ora presenta un tote section in interlingua pro touristas .

Le participantes del 13tie incontro nordic de interlingua pote ora informar se del belle insula Tjörn in Svedia gratias a un nove section in interlingua in le sito del municipio.

UMI  Le sexte plus grande insula in Svedia, Tjörn, augmenta cata estate su population ab 15.000 a circa 45.000 personas. Le attraction es inter alteres le belle natura, e ora le municipio vole attraher ancora plus de touristas per presentar se in interlingua.

Tjörn essera le centro del 13tie incontro nordic de interlingua in julio 2012, e le municipio pro isto aperiva in martio un tote section informative de Tjörn in interlingua in su sito in Internet al adresse www.tjorn.se/interlingua. Breve presentationes con multe photos describe le belle ambiente e su multe possibilitates e activitates pro le habitantes e pro le touristas, qui veni pro experientiar iste parte de Svedia al costa west.

Le section in interlingua describe, como le cultura floresce in le lumine del mar, factos super Tjörn, le insula de opportunitates, le insula de vacantias, le bon vita, le historia de Tjörn, tempore libere sur Tjörn, un amico pro le vita e un inspirante climate pro commercios.

Le section touristic in interlingua se ha realisate in un collaboration con le Societate Svedese pro Interlingua a que il ha un ligamine ab le sito de Tjörn.

Lege anque
Invitation: Inscribe vos pro le incontro nordic de interlingua
Incontro nordic sur un belle insula in julio 2012
Le scheda de inscription pro le 13tie incontro nordic de interlingua (in formato PDF)