Multe nove additiones in le Bibliotheca digital in interlingua. Discarga los pro le vacantias estive.

UMI  Il ha nulle ration pro considerar le estate longe e tediose. Le numero de e-libros in interlingua cresce sempre, e anque multe audiomateriales appare.

Le Bibliotheca digital in interlingua (www.interlingua.com/e-libros) presenta un serie de nove e-libros e audiolibros pro le estate. Illo es un collection de materiales gratuite in interlingua que on pote leger directemente sur le schermo o discargar pro su tabletta computatorial o e-lector, o audir sur un sonator MP3.

Le nove "collection estive" consiste in iste momento de tres nove e-libros. In "Un reliquia del era pliocen" per le autor ben cognoscite Jack London, le persona principal se trova justo in le natura salvage, quando un companion que ille non desira troppo incontrar, arriva e conta su narration quasi incredibile super... si, super que? Un certe reliquia del era pliocen - inter 5,3 e 1,8 milliones de annos ante nostre tempore.

Mikhail Kuzmin (1872-1936) esseva un prominente contributor al Era Argentin del poesia russe. "Duo fabulas", in traduction maestrose in interlingua per Onofrio Notarstefano, presenta "Le regulas cavalleresc" e "Le sex fidantiatas del rege" como exemplos de su production.

"Psalmos e canticos - traductiones biblic con notas textual per le traductor" contine 13 psalmos, Magnificat e Nunc Dimittis, omnes traducite in interlingua in 1959 per le abbate francese Raymond Volf. Le quaderno esseva republicate in 1982 in un parve tirage e ora de novo in 2012. Illo esseva le prime fragmento del Biblia a esser traducite in interlingua.

Contos original - con voces famose

"Le donos del fee" e "Un micre fabula" es inter le dece-duo novellas original que le pseudonymo Esbern Hak (alias Hans Neerbek) scribeva e publicava in le collection "Paletta". Audi los per tu sonator de MP3 in un registration per Thomas Breinstrup.

"Dece contos" es un perla con parve historias curiose e original in interlingua, scribite per Alexander Gode-von Aesch, le ultime director de recercas de IALA e le redactor del "Interlingua-English Dictionary". Durante le 7me Conferentia International de Interlingua in Danmark in 1985, un serie de personas registrava le dece contos originalmente seligite per John Lansbury e primo publicate in 1958. Gaude ci de tres de illos, legite per tres nomines ben cognoscite de interlingua: Ingvar Stenström lege "Miss Anatomica", Ferenc Jeszenszky lege "Elemento Mancante", e Bent Andersen lege "Soldanella". Un excellente experientia pro le estate.