Le 62nde anniversario de interlingua le 15 de januario 2013 essera celebrate per un revista commemorative special - ma adjuta es demandate.

UMIGrammatica de Interlingua  Un revista commemorative va celebrar le 62nde anniversario de interlingua le 15 de januario, al annual Die de Interlingua.

Carlos Soreto, representante de interlingua pro Portugal e ex-secretario general del Union Mundial pro Interlingua (UMI), ha lanceate le initiativa de publicar un revista pro commemorar le anniversario e cerca ora le adjuta de omnes qui ha interesse historic.

"Io lancea un defia al fortias vive del movimento pro collaborar in iste evenimento per inviar me [interlusitana@gmail.com] materiales oblidate in vostre tiratorios – o nove materiales –, subordinate al themas listate infra, usque al 24 de decembre," ille dice.

Le lista comprehende:

  • Historia
  • Illustration (copertura de revista (A5), bandas designate, altere illustrationes)
  • Linguistica e etymologia
  • Litteratura (biographia, conto, critica litterari e recension de libros, poesia)
  • Photographia
  • Rumpecapites

Articulos debe haber, al maximo, 6 paginas A4 typate in Times New Roman a 12 puncto (formato: .doc(x) o .odt), e le photographias e illustrationes debe haber un bon resolution graphic (in .jpg, .png o .tiff).

Omne collaboratores ha le derecto a un exemplar del revista final in formato .pdf, e le autor del melior travalio recipera un copia in papiro como premio. Le obra final essera imprimite per le casa editorial Lulu.

"Non lassa que le presente crise (financiari e moral) bloca tu creativitate e imagination e participa in iste parve contribution pro divulgar, creativemente, le hereditage cultural del humanitate que es interlingua," dice Carlos Soreto qui gaude al bon contributiones.

Lege plus:
Le die mundial pro interlingua - con informationes super le annual Die de Interlingua le 15 de januario
Le section Historia de interlingua - con multissime materiales, factos, photos etc. del historia de interlingua, un section que sempre cresce con nove materiales