Nove materiales gratuite pro apprender interlingua es preste in le duo series "Cartas nordic" e "Viagia con interlingua".

UMI  Malmö, Roskilde e Nice es le tres destinationes le plus recente in le series de materiales pro le inseniamento de interlingua que ha justo apparite.

In le serie "Cartas nordic", le lectores es invitate iste vice a Malmö in le sud de Svedia pro visitar le mercato central con un statua de un rege sur cavallo e a Roskilde in le est de Danmark pro vider le famose cathedral ubi quasi omne reges e reginas es sepelite. Le "Cartas nordic" es un serie de materiales illustrate e informative que on pote usar in le inseniamento de interlingua - como autostudio, pro cursos etc. Il ha ora 30 cartas con motivos de varie partes del paises nordic - Danmark, Norvegia, Svedia, Finlandia e Islanda.

Cata carta ha un illustration de un loco o location interessante e un breve texto informative e narrative in interlingua. Le photos e informationes pote esser usate in cursos, o si on mesme vole studiar interlingua sin professor. Pro cata carta il ha cinque questiones super le texto. Un instruction con ideas de como usar le cartas pote esser anque discargate. Omne cartas se trova in le section Inseniamento (sub "Libros e litteratura"). Illos es in le formato PDF que on pote facilemente imprimer.

In le altere serie de materiales gratuite, "Viagia con interlingua", le viage va iste vice al mercato in Nice, ubi on pote comprar deliciose panes, mustarda, salsicias de varie typos, sapones e condimentos. "Viagia con interlingua" es un serie con conversationes quotidian in interlingua con utile phrases e parolas e con belle photos inspirante que es apte pro un conversation in interlingua.

Discarga le nove Cartas nordic e "Un visita al mercato in Nice":
Multe materiales pro le inseniamento de interlingua

Inseniamento - nove materiales
Apprende interlingua in un maniera amusante e informative per le Cartas nordic e le serie "Viagia con interlingua".