Nove mini-guida illustrate explica como facile il es contribuer a augmentar le encyclopedia libere in interlingua.

  Un encyclopedia solmente es bon, si on pote expectar trovar un responsa in illo. Pro isto le Wikipedia in interlingua ora demanda adjuta pro augmentar le numero de entratas, e omnes pote assister per scriber super lor themas favorite.

Un nove mini-guida de duo folios A4 explica con multe illustrationes, como on lo face. In breve, on debe crear un nomine de usator, e alora on ha accesso a adder nove explicationes in le Wikipedia in interlingua (http://ia.wikipedia.org). On pote naturalmente anque developpar articulos ja scribite con extra informationes. On labora directemente in su programma de Internet (Internet Explorer, Firefox, Opera, Safari, Chrome etc.) e assi non besonia altere programmas.

Le Wikipedia in interlingua actualmente ha quasi 15.000 entratas - longe e breve. Illo es numero 105 inter wikipedias in omne linguas, e le desiro es naturalmente que illo cresce e deveni multo plus comprehensibile, assi que on pote expectar sempre trovar un responsa a lo que on cerca.

Le articulos debe esser si factual e precise como possibile. Il non se tracta de scriber un roman, e isto face le carga minus grande. Si on scribe super un thema de interesse, p.ex. un hobby, il es plus facile contribuer. E si on non se senti secur, si su linguage es toto correcte, on pote simplemente marcar le articulo. Alora le altere redactores del Wikipedia in interlingua pote facilemente trovar le articulo e controlar - e eventualmente corriger - lo.

Le mini-guida ha essite elaborate per Thomas Breinstrup, redactor del Panorama.


Le Wikipedia in interlingua se developpa sempre, ma omnes pote assister. Ora un nove mini-guida explica in maniera facile como on lo face.