Participantes de quatro continentes e 16 paises se reuniva pro sex dies plen de interlingua. Le resultatos va materialisar se durante le proxime septimanas.

UMIIngvar Stenström e Ingrid Ivarsson  Sex dies in e con interlingua. Intense, interessante e inusualmente effective.

Le combinate 20me conferentia international de interlingua e 14te incontro nordic de interlingua in le citate balneari Åsa al costa west de Svedia le 29 de julio al 3 de augusto 2014 deveniva un grande successo, ubi participantes de quatro continentes e dece-sex paises se reuniva pro parlar, laborar, orientar se e intertener se. Activitates, cursos, officinas thematic de labor, intertenimento, presentationes e discursos, excursiones e multo plus plenava le sex dies que totevia manteneva un atmosphera relaxante in le natura phantastic con belle tempore, bon temperaturas e un meraviliose panorama supra le mar.

Durante le veniente septimanas, tote le initiativas prendite durante le conferentia/incontro va materialisar se digitalmente e analogemente, i.a. ci in www.interlingua.com.

Le organisatores - le quatro organisationes nordic de interlingua e le Union Mundial pro Interlingua - regratia omne participantes pro lor supporto, bon energia, vivide interesse e bon humor.

Reportages e novas del conferentia/incontro va apparer in le veniente edition del magazin international de novas, Panorama in interlingua.

PHOTO: Ingvar Stenström e Ingrid Ivarsson del Societate Svedese pro Interlingua durante un presentation al combinate conferentia international e incontro nordic de interlingua. Photo: Thomas Breinstrup