Le secunde libro de Moses, Exodo, es ora disponibile de novo.

UMIExodo  Le reedition del prime partes del Biblia in interlingua continua.

Le 1 de februario esseva publicate "Exodo", le si-appellate secunde libro de Moses, in le traduction in interlingua per Simon W. Buckhalter (1904-1985). Ille esseva irlandese e professor e traduceva in toto 11 partes del Biblia in interlingua ab le hebreo, e su editiones es fornite con notas textual, assi que on pote melio comprender le texto.

"Exodo" es le secunde libro in le Biblia. In illo, Deo demanda Moses a ducer su populo, le israelitas, ex Egypto. Le pharaon in Egypto non vole lassar le populo viagiar, ma post que Deo lassava un serie de plagas colpar Egypto (le dece plagas de Egypto), Moses poteva ducer su populo e salvar lo del armea del pharaon al miraculo del Mar Rubie, ubi ille separa le mar, assi que le populo pote escappar. Pois Deo se manifesta pro Moses al Monte Sinai e le dona le Dece Commandamentos.

Le Union Mundial pro Interlingua es in le processo de assecurar que un serie de libros, que ja o quasi es exhaurite, es de novo disponibile e pote esser comprate. "Exodo" es le secunde de iste titulos. Le prime esseva "Genesis" (alias le prime libro de Moses) que esseva publicate al Die de Interlingua le 15 de januario. Le sequente editiones essera le tertie, quarte e quinte libros de Moses, "Levitico", "Numeros" e "Deuteronomio", e pois le reeditiones continua secundo un lista planificate.

On pote vider tote le libros e litteratura e comprar e pagar los directemente in Litteratura in interlingua. Memora que tu supporta interlingua e le labor pro diffunder le uso del lingua per comprar libros in interlingua, e al mesme tempore tu maestria del lingua deveni sempre plus bon. Le precios del libros es sempre modeste. On pote sparniar multe moneta per comprar plure libros e solmente pagar le porto postal un vice.