51.500 parolas inverse in interlingua
Nove dictionario multo special con omne parolas alphabetisate inversemente ha apparite.
51.500 parolas in interlingua alphabetisate inversemente, i.e. secundo le ultime littera, pois le penultime etc. ma sin explicationes ulterior. Isto es le nove "Dictionario inverse de interlingua" de 388 paginas que ha apparite le 14 de maio.
Un tal dictionario special (anque appellate un dictionario retrograde per expertos) es multo utile pro analyses del lingua, pro discoperir un final specific de parolas e - in un certe grado - como un dictionario de rimas. Le fundamento del vocabulario es le enorme "Dictionario interlingua-nederlandese" per Piet Cleij, que Thomas Breinstrup ha redigite. Le dictionario contine nulle explication del 51.500 parolas ma indica le typo de parola (substantivo, verbo, adjectivo etc.) e marca le pronunciation per accentos. Le precio es 20 euros.
Piet Cleij moriva in januario 2015, 87 annos, e assi non succedeva vider le resultato de su grandiose labor lexicographic. Ma parallelmente con le publication del "Dictionario inverse de interlingua" es publicate, ci in www.interlingua.com, le lista con omne le 51.500 parolas in ordine alphabetic normal e con indication del typo de parola, assi que autores de dictionarios futur in interlingua pote sparniar multe tempore e immediatemente comenciar lor labor. Iste listas es gratuite a discargar.
On pote vider tote le libros e litteratura e comprar e pagar los directemente in Litteratura in interlingua. Memora que tu supporta interlingua e le labor pro diffunder le uso del lingua per comprar libros in interlingua, e al mesme tempore tu maestria del lingua deveni sempre plus bon. Le precios del libros es sempre modeste. On pote sparniar multe moneta per comprar plure libros e solmente pagar le porto postal un vice.
Visita le grande catalogo con Litteratura in interlingua
o compra "Dictionario inverse de interlingua" directemente.