Radio Interlingua: 60 annos con le UMI
Interview con un del fundatores del Union Mundial pro Interlingua, que in julio habeva 60 annos.
Radio Interlingua presenta in su nove emission un interview con un del personas, qui esseva presente, quando le Union Mundial pro Interlingua (UMI) esseva fundate ante 60 annos.
Ingvar Stenström, qui es le secretario del Societate Svedese pro Interlingua, participava in le casa municipal in Tours in Francia le 28 de julio 1955, quando participantes ab tote le mundo se incontrava pro le prime conferentia international de interlingua - e pro fundar un organisation global pro promover interlingua.
In un interview con Thomas Breinstrup, redactor del magazin Panorama in interlingua, Ingvar Stenström narra le historia de que occurreva, e qui esseva presente al fundation del UMI, que de facto non esseva specialmente celebrate.
On pote leger multo plus in le libro historic per Ingvar Stenström, “Interlingua e su promotion durante 50 annos” (270 paginas illustrate, 11,04 euros excl. porto postal).
Radio Interlingua es radio totalmente in interlingua. Le emissiones ha devenite multo popular. Milles de personas los discarga in formato MP3 o ascolta directemente in www.interlingua.com/radio. Omne le 61 emissiones es a disposition - un ricchessa de audio in interlingua con multe voces, multe bon historias e multe interlingua.