Le sex dies del 21me conferentia international de interlingua in Benidorm in Espania deveniva un grande successo.

UMI21me conferentia international de interlingua  Un calor de 25-28 grados, un longissime plagia e numerose cafés con offertas attractive non impediva le participantes in le 21me conferentia international de interlingua de participar activemente in cursos, discussiones de nove possibilitates o ir a excursiones. Le sex dies in septembre in le urbe espaniol de vacantias Benidorm al Costa Blanc assi se inscribeva in le historia de interlingua, exactemente 60 annos post que le Union Mundial pro Interlingua (UMI) esseva fundate in 1955.

Minus que 100 metros del plagia con le sablo fin, le conferentia esseva organisate in Hotel Tanit. Ci il habeva cursos pro comenciantes e de conversation durante le matinos, ante que le participantes de numerose nationes continuava con le discussiones plus seriose, sessiones de labor, reportos de lor labor pro interlingua, e le discursos e presentationes super i.a. le similaritates e differentia inter espaniol e interlingua o le historia fascinante de Radio Nederland International. Naturalmente toto esseva finite per un vespere con musica e cantos in interlingua ultra le numerose conversationes amical e agradabile inter le participantes.

E de tote le mundo veniva salutes in scripto o video de illes, qui haberea amate participar anque personalmente - e assi i.a. haber visitate un ver fabrica de chocolate!

Si on dubitava le usabilitate practic de interlingua in communicar con personas, qui parla linguas romanic, on poteva experientiar cata die que interlingua es absolutemente comprensibile a prime vista (o: aure) in le stratas, in le botecas e in le reception.

Le 21me conferentia international de interlingua, que habeva loco le 19-24 de septembre, celebrava le 60esime anniversario del UMI, fundate in Tours in Francia le 28 de julio 1955, e le secretario general del UMI, Julian Mendez, monstrava como interlingua mesmo in mille annos essera ancora presente e de grande valor.

Le proxime edition septembre-octobre del magazin international de novas, Panorama in interlingua, publicara reportos, reportages, novas e photos del sex dies active, ubi interlingua esseva parlate de matino a vespere - a vices mesmo durante le somno in le capite de alcun participantes.