Le nove emission de Radio Interlingua presenta le poeta Marcus Scriptor, qui scribe obras original in interlingua, e demonstra como on pote usar interlingua ben a un mercato espaniol pro facer compras.

UMIRadio Interlingua  Ha tu ulle idea quanto simile interlingua e espaniol es? Ha tu audite un genuin rap in interlingua? E pote on vermente scriber bon poesia in interlingua?

Omne le tres questiones es respondite in le nove emission de Radio Interlingua. Durante circa 25 minutas le ascoltatores habera un excellente introduction practic de que occurre, quando on parla interlingua a un mercato espaniol, e Radio Interlingua ha interviewate Marcus Scriptor, le diligente poeta qui scribe poemas, raps, contos e mesmo libros original in interlingua. Marcus Scriptor, que es le nomine de pluma pro Kenneth Platter de Svedia, anque lege plure de su poemas, como ille los presentava al 15te incontro nordic de interlingua in Danmark in julio. Le musica es un rap original in interlingua scribite e presentate per Marcus Scriptor.

Como sempre multe voces pote esser audite in le emission que es presentate per redactor Péter Kovács.

Radio Interlingua es popular inter su ascoltatores. On pote audir omne le 63 emissiones directemente in www.interlingua.com/radio, o on pote discargar omne 63 emissiones - o solmente alcunos secundo su preferentia, naturalmente - in le formato MP3, assi que on pote ascoltar los, quando on ha tempore, in su telephono mobile, su computator o su sonator MP3.

Radio Interlingua es un ricchessa de audio in interlingua con multe voces, multe bon historias e multe interlingua. Il habera un nove emission circa cata mense. Radio Interlingua es radio totalmente in interlingua.

Kenneth Platter presentava su obras al 14te incontro nordic de interlingua in 2014. Vide su presentation in Incontro con le poeta Marcus Scriptor.