Multe nove materiales in interlingua pro cursos - o pro studiar mesme in casa. Comencia le viage hodie. Illo es gratuite.

UMINove materiales in interlingua  Si tu ha alcun horas libere durante le veniente septimanas, nos va invitar te a un tour in Scandinavia - e un deviation a Vienna.

Le duo series con materiales pro cursos o pro autostudio, "Cartas nordic" e "Viages con interlingua", deveni sempre plus comprehensive. Illos ha ora essite supplementate con ancora cinque materiales.

Le "Cartas nordic" invita le lector a locos interessante in le cinque paises nordic - Islanda, Danmark, Norvegia, Svedia e Finlandia - per cartas postal in interlingua. Cata carta monstra un motivo de un location nordic, e le breve texto accompaniante explica un poco super le loco. Un mappa monstra, ubi illo es situate geographicamente, e sub le carta il ha cinque questiones in interlingua al texto - un excellente maniera de leger e apprender interlingua.

Per le nove cartas, nos visita i.a. Tivoli in Copenhagen, Kristiansand in Norvegia, le cascada le plus longe in Svedia e le corpore le plus ben conservate in le mundo del tempore preroman trovate in un marisco danese.

On pote seliger le cartas con le photos le plus belle - e apprender multo super le geographia nordic. "Cartas nordic" ora comprehende 55 cartas, omnes como un file PDF que on pote discargar e imprimer.

In le serie de conversation, "Viages con interlingua", le tour va Vienna in Austria pro un visita in un famose café. Como sempre le texto es un conversation con parolas e expressiones quotidian e con belle illustrationes, assi que on pote practicar parlar interlingua. Il ha un pagina con exercitios pro le texto. Il ha ora 18 episodios in le serie, ubi nos seque le amicos Anna, Petro e Paulo a lor multe viages.

Visita le section "Instruction de interlingua" e discarga tote le materiales gratuite.