Le nove emission de Radio Interlingua narra super le canto de Natal le plus famose in le mundo - e invita a apprender interlingua.

UMIRadio Interlingua  Le canto de Natal le plus famose in le mundo naturalmente anque existe in interlingua, e su origine es un ver mysterio de Natal.

Le 64te podcast de Radio Interlingua describe como "Nocte seren" esseva scribite e cantate pro le prime vice le 24 de decembre 1818. Illo ha devenite un legenda, e le belle historia del canto es fascinante - e surprendente. Hodie le canto existe in al minus 143 differente linguas.

Le 20 minutas in Radio Interlingua anque offere le actualitates le plus recente de interlingua e introduce un nove section: Apprende interlingua con Radio Interlingua. In iste emission il se tracta de parolas identic con significationes differente, a saper le parolas "confortabile" e "station".

Thomas Breinstrup es le hospite de iste Radio Interlingua.

Radio Interlingua es popular inter su ascoltatores. On pote audir omne le 64 emissiones directemente in www.interlingua.com/radio, o on pote discargar omne 64 emissiones - o solmente alcunos secundo su preferentia, naturalmente - in le formato MP3, assi que on pote ascoltar los, quando on ha tempore, in su telephono mobile, su computator o su sonator MP3.

Radio Interlingua es un ricchessa de audio in interlingua con multe voces, multe bon historias e multe interlingua. Il habera un nove emission circa cata mense. Radio Interlingua es radio totalmente in interlingua.