Le stand de interlingua al exposition de libros in Göteborg esseva multo ben visitate - como es anque un nove serie con breve videos in interlingua.

UMIRadio Interlingua  Un visita al exposition le plus grande de libros in Scandinavia e le stand de interlingua. E un nove serie de parve videos in interlingua que ja ha devenite multo popular.

Isto es le contento del 66te emission de Radio Interlingua - le loco, ubi tu sempre pote audir interessante personas e interessante novas super interlingua. Radio Interlingua es a disposition 24 horas per die, 365 dies per anno directemente in www.interlingua.com/radio o como podcast, isto es files in le formato MP3 que tu pote discargar e audir quando tu ha le tempore.

Iste vice nos va primo al grande exposition de libros in Göteborg in Svedia, le exposition le plus grande de libros in Svedia, visitate per 100.000 personas. Ci le Societate Svedese pro Interlingua ha durante quatro dies habite su stand pro promover interlingua. Audi le reportage e le interviews con Barbara Rubinstein e Inger Olsson, qui explica super le experientias.

Pois Radio Interlingua parla con Alberto Mardegan, le administrator del Union Mundial pro Interlingua, super su nove serie de breve videos in interlingua publicate in YouTube. ”Pensatas in interlingua” es le titulo del serie, registrate durante que Alberto marcha de un loco a un altere e reflecte de differente themas. E ille desira que multe alteres anque registra videos in lor partes del mundo.

Radio Interlingua es radio totalmente in le international lingua auxiliar interlingua. Nos essaya includer si multe differente personas como possibile, proque il ha tante bon historias e interessante novas a narrar. Radio Interlingua assi es radio intelligente e radio interessante – e radio in interlingua.