Mini-dictionarios in danese, svedese, norvegiano e francese adjuta le usatores de interlingua.

UMI  Mini-dictionarios con circa 2.000 parolas frequente in interlingua ha essite publicate in nove versiones actualisate, gratuitemente discargabile como files PDF, preste a usar in un schermo o pro imprimer mesme sur papiro.

Mini-dictionarios de interlingua

Le mini-dictionarios in danese, norvegiano e francese contine vocabularios national-interlingua/interlingua-national, durante que le version svedese solmente contine un vocabulario interlingua-svedese (e non svedese-interlingua).

Omne le quatro publicationes explica brevemente le grammatica de interlingua, le version svedese in forma plus extense. Assi le mini-dictionarios deveni un excellente instrumento basic pro usatores de interlingua, qui rapidemente pote consultar los quando illes lege o scribe textos in interlingua o conversa in le lingua.

Le mini-dictionarios danese, norvegian, svedese e francese pote esser discargate de www.interlingua.com/instruction-national que contine multe altere materiales pro cursos e autostudio de interlingua in plure linguas. Illos anque tosto essera discargabile del sitos national del Union Danese pro Interlingua, del Societate Svedese pro Interlingua, del Union Norvegian pro Interlingua e del Union Interlinguista de Francia.

Le Union Mundial pro Interlingua spera que mini-dictionarios de interlingua va esser elaborate in ancora multe altere linguas.