"Dece contos" e "Discussiones de interlingua" ha essite publicate in le 3e edition.

UMIDece contos e Discussiones de interlingua  Duo libros in interlingua per Alexander Gode - le ultime director de recercas del "International Auxiliary Language Association" que preparava interlingua - ha essite publicate de novo in le 3e edition.

"Dece contos" e "Discussiones de interlingua" es ora a disposition per Litteratura in interlingua pro respectivemente 5 e 8 euros, exclusive porto postal.

"Dece contos" es un collection de breve obras original scribite per Alexander Gode (1906-1970). Ille voleva essayar usar interlingua pro litteratura, durante que ille cata die traduceva textos e summarios technic e scientific in interlingua. Le libro contine le dece contos Miss Anatomica, Le Veteranos, Microbio Magallanes, Emmerichia, Via Spiral, Amata, Elemento Mancante, Valisiologia, Yuichi e Soldanella.

"Discussiones de interlingua" es 18 articulos e presentationes que describe le essentia de interlingua. Alexander Gode esseva un communicator phenomenal, e ille participava active- e ingagiatemente in debattos super le defias lingual que interlingua pote solver como instrumento moderne de communication international - o communication sin frontieras que es le motto de interlingua. In le articulos facile e capturante a leger, ille documenta i.a. le processo per le qual interlingua esseva definite, su relation al latino classic e medieval, e al vocabulario scientific international. Alexander Gode explica "le anima de interlingua" e su considerationes personal del developpamento e futuro de interlingua.

Compra "Dece contos" e "Discussiones de interlingua" directemente.