Discoperi plus super le litteratura romanic, super le historia de Europa e super le lingua valencian - toto gratuitemente.

UMI  Tres nove libros digital in interlingua ha essite addite al Bibliotheca electronic in interlingua que assi continua crescer con lectura gratuite in interlingua pro multissime horas.

Vicente Costalago de Espania es le autor productive del tres obras: "Litteratura romanic e interlingua", "Historia de Europa" e "Concise description del lingua valencian". Illos ha justo essite publicate in formato PDF que on pote discargar e leger sur un schermo e assi augmentar su cognoscentias a nove themas.

Litteratura romanic e interlingua"Litteratura romanic e interlingua" presenta le historia del litteratura romanic e de interlingua. Le libro vide un linea natural le qual comencia con le latino, seque con le linguas romanic e fini con interlingua. Le scopo del libro es que le lector pote cognoscer le origines de interlingua, i.e. le latino e le linguas romanic, e anque interlingua. Vicente Costalago narra super grande autores e grande obras e seque le developpamento del linguas.

Historia de Europa"Historia de Europa" es un viage a transverso le historia de Europa in un presentation del evenimentos le plus importante que ha occurrite in iste continente - ab le apparition del prime hominides usque hodie. Un maniera de apprender super le historia de Europa e anque interlingua.

Concise description del lingua valencian"Concise description del lingua valencian" describe le valenciano, que es parlate per 2 milliones de personas in le Communitate Valencian (in le est de Espania), ubi illo es un lingua official juncte con le espaniol. In iste libro, Vicente Costalago da un breve presentation del historia, le grammatica e le orthographia del lingua. Tote isto es accompaniate de un bibliographia que pote esser utilisate pro illes qui vole saper plus.

Visita le Bibliotheca electronic in interlingua - un ample collection de e-libros belletristic e professional, redigite e publicate per le Union Mundial pro Interlingua (UMI). Illo comprehende e-libros e audiolibros, preste a discargar e leger/audir.