Panorama es publicate totalmente in colores
Le magazin official del Union Mundial pro Interlingua es ora imprimite totalmente in colores.
Post 198 editiones e 33 annos le magazin official del Union Mundial pro Interlingua, Panorama in interlingua, es pro le prime vice imprimite totalmente in colores.
Le 28 paginas del edition novembre-decembre es assi le début de un fortification del Panorama pro facer lo plus attractive in le labor de promover interlingua e assecurar que sempre plus de interessatos studia e usa le lingua.
"Isto es un columna milliari pro Panorama. Le abonatos digital ha desde 2010, isto es durante dece annos, legite Panorama in colores. Finalmente tote lectores pote gauder al maximo del magazin," dice Thomas Breinstrup, redactor in chef del magazin.
Panorama in interlingua appare omne duo menses con 28 paginas totalmente in interlingua in cata edition. Le magazin ha essite publicate desde januario 1988. Assi ha apparite totalmente 5.544 paginas in interlingua in le 198 editiones usque ora publicate.
Le cambio a colores non habera influentia al precio de abonamento. Illo remane le mesme, i.e. 25 EUR pro un anno, si on desira reciper le version imprimite, e 10 EUR pro un anno pro le version digital, livrate in formato PDF. Le duo versiones es identic, ma le version digital es livrate immediatemente post le publication, proque illo non debe attender le expedition via posta.