Le 15 de januario es le annual Die de Interlingua. Supporta lo per tu activitates.

UMIDie de Interlingua  Le 15 de januario es le annual Die de Interlingua, un die de activitates – grande e parve – que face interlingua visibile pro le grande publico e attrahe su attention verso apprender e usar lo.

Le Die de Interlingua esseva instituite in 1992 pro crear interesse pro interlingua. Le 15 de januario es le data ubi le prime obra in interlingua, le “Interlingua-English Dictionary”, esseva registrate con derecto de autor presso le autoritates american.

A iste die, tote initiativas conta, dunque il vale esser creative.

Pro isto le Union Mundial pro Interlingua incoragia omnes a facer effortios pro interlingua le 15 de januario (o durante tote le septimana, si on ha le energia). Multe mesmo parve eventos pote haber un grande influentia total.

Sia active in le medios social, crea un film in YouTube o Vimeo, contacta un jornal o un firma, arrangia un exposition, face un breve presentation de interlingua ante tu amicos – il ha nulle limites. On pote anque usar le die (o un parte de illo) pro ameliorar su proprie cognoscentia a interlingua e apprender nove parolas, comprar e leger un libro etc. On pote visitar le pagina Die de Interlingua pro obtener inspiration e www.interlingua.com/instruction pro discargar le multe gratuite materiales didactic pro apprender interlingua o www.interlingua.com/instruction-national pro cursos, grammaticas e dictionarios.