Le Union Mundial pro Interlingua invita interessatos a celebrar le Die de Interlingua le 15 de januario.

UMIDie de Interlingua  Le 15 de januario es le annual Die de Interlingua, e le Union Mundial pro Interlingua (UMI) invita interessatos a celebrar lo in un incontro digital via Zoom.

Le incontro es organisate venerdi le 15 de januario 2021 a 19.00 horas UTC (20.00 horas CET, 14.00 horas EST) con un duration approximate de un hora.

Le incontro es un possibilitate de assemblar interessatos active de interlingua, qui desira supportar le promotion e diffusion de interlingua. Le Die de Interlingua es un die de activitates pro facer interlingua visibile pro le grande publico e attraher attention verso apprender e usar le lingua.

Pro participar in le incontro on debe registrar se presso le secretario general del UMI per su nomine e adresse de e-posta. Pois on recipe le instruction de como connecter se al evento que naturalmente es in interlingua.

Le secretario general del UMI, Julian Mendez, va gerer le incontro, in le qual va participar anque altere membros del consilio executive del UMI pro un conversation agradabile e inspirante in interlingua.

Le UMI spera que multes va utilisar le chance pro supportar le communitate vivente e active de interlingua.

Le Die de Interlingua esseva instituite in 1992 pro crear interesse pro interlingua. Le 15 de januario es le data ubi le prime obra in interlingua, le “Interlingua-English Dictionary”, esseva registrate con derecto de autor presso le autoritates american.