Le Union Mundial pro Interlingua invita interessatos de interlingua a un incontro digital cata mense, le prime le 9 de april.

UMIIncontro digital in interlingua  Le duo incontros digital in januario e martio ha essite un successo si grande, que le Union Mundial pro Interlingua ora introduce incontros digital via Zoom con usatores active de interlingua cata mense pro agradabile conversation in interlingua.

Le incontro digital essera le prime venerdi del mense, ma a causa del pascha le UMI organisa le proxime nove incontro digital venerdi le 9 de april 2021 a 18.00 horas UTC (20.00 horas CEST) via Zoom. Le duration approximate es un hora.

Le incontro es un excellente possibilitate de assemblar interessatos active de interlingua, qui desira supportar le promotion e diffusion de interlingua. Un prime e importante passo es cognoscer le unes le alteres. Alora veni automaticamente le inspiration e le excambio de ideas.

Durante le prime incontro digital al Die de Interlingua le 15 de januario, quando interlingua habeva 70 annos, plure participantes exhortava le UMI a continuar le incontro successose con un agradabile atmosphera amical.

Pro participar in le incontro e reciper le instruction de como connecter se al evento, que naturalmente es in interlingua, on debe registrar se presso le secretario general del UMI, Julian Mendez.

Ille anque va gerer le incontro pro un conversation agradabile e inspirante in interlingua.

Le UMI spera que multes va utilisar le chance pro supportar le communitate vivente e active de interlingua e participar in le conversation in interlingua.

Le veniente incontros digital le prime venerdi del mense essera annunciate via www.interlingua.com.