Usa le occasion de presentar un thema que te interessa in interlingua al 24e conferentia international de interlingua le 1-6 de augusto 2021.

UMI24e conferentia international de interlingua  Le Union Mundial pro Interlingua invita propositiones pro breve presentationes/discursos in interlingua al 24e conferentia international de interlingua in augusto.

Le 24e conferentia essera arrangiate le 1-6 de augusto 2021. Il habera duo modulos cata die: 15.00-16.30 horas CEST (13.00-15.30 h. UCT) e 20.00-21.30 horas CEST (18.00-20.30 h. UCT). Le tempore inter le duo modulos pote esser usate pro conversation social e/o labor in gruppos.

Le 24e conferentia essera le prime que essera totalmente digital. A causa del coronavirus il esseva decidite in april cancellar un arrangiamento physic iste anno, ma le plano es retornar a un conferentia physic – con un elemento digital – in 2023, quando le 25e conferentia habera loco.

Actualmente le programma del 24e conferentia es sub planification, e pro isto le UMI invita propositiones concrete pro breve presentationes in interlingua. Le themas non debe esser interlingua, ma le presentationes debe esser in interlingua e tractar qualcosa que interessa le presentator: un hobby interessante, un labor interessante, un viage interessante...

Invia un breve description de tres-quatro lineas in interlingua super le proposition concrete que tu desira presentar al arrangiatores del 24e conferentia.

Le comité del programma te contactara, si tosto que nos ha un supervista del presentationes proponite e ha decidite, qual presentationes potera esser parte del programma.

Visita le pagina con le conferentias international de interlingua.