Le 24e conferentia international de interlingua in augusto se approxima. Le preparationes es in plen activitate. Ecce un supervista actual. Gaude te!

UMI24e conferentia international de interlingua  Ecce un supervista actual del 24e conferentia international de interlingua:

■ SEX DIES TOTALMENTE DIGITAL: Le 24e conferentia essera le prime conferentia totalmente digital (a causa del coronavirus) e como sempre totalmente in interlingua. Le datas es dominica le 1 a venerdi le 6 de augusto 2021 (inclusive).

■ VIA ZOOM: Le 24e conferentia usa le technologia de Zoom. Il habera un virtual sala conferential e cameras pro labor in gruppos que on selige quando on entra.

■ INSCRIPTION NECESSARI: Il essera gratuite participar, ma on debe inscriber se pro obtener le contrasigno pro accesso. Omnes debe participar con lor nomines normal, nulle pseudonymos. Reguarda www.interlingua.com pro tosto poter inscriber te.

■ ACTIVITATES: Proque il es le prime vice que le Union Mundial pro Interlingua (UMI) arrangia un conferentia digital, cosas se cambia sempre durante le preparation. Il habera duo modulos per die (vide in basso) e un pausa, ubi il es possibile remaner in linea e conversar con le altere participantes, planificar activitates commun o laborar in gruppos super projectos e cargas. Le horas del modulos se ha adjustate un poco.

■ CONFERENTIA IN DUO MODULOS CATA DIE: Le conferentia de interlingua habera duo modulos cata die, ab le 1 al 6 de augusto 2021, con un pausa pro conversation social:
• 14:00-15:30 UTC (16:00-17:30 CEST, 10:00-11:30 EDT): prime modulo
• 15:30-18:00 UTC (17:30-20:00 CEST, 11:30-14:00 EDT): pausa pro prender un bibita e conversar
• 18:00-19:30 UTC (20:00-21:30 CEST, 14:00-15:30 EDT): secunde modulo

■ LE PROGRAMMA PROGREDE: Le programma pro le sex dies es sub planification intense. Le labor de coordination pro assecurar un programma variate e excitante es comprehensive. Detalios essera tosto publicate in www.interlingua.com – visita lo de tempore in tempore pro leger novas. Multes ha contribuite con bon propositiones a punctos concrete. Ora le arrangiatores labora con le grande puzzle a publicar tosto in le grande lineas. Certo il habera adjustamentos; anque illos essera publicate currentemente in le pagina conferential.

■ GAUDE TE!: Gaude te e sia positive, quando tu participa, assi que le experientia e le resultatos essera optimal, e que omnes senti esser in compania agradabile e creative.

Visita le pagina con le conferentias international de interlingua.