Le grande svedese, qui ganiava le supernomine Interlingvar in admiration, se ha addormite pacificamente, 93 annos de etate, post haber laborate in e pro interlingua durante 70 annos.

UMIIngvar Stenström  Interlingua ha perdite un del ver gigantes. Ingvar Stenström se addormiva pacificamente le 19 de decembre 2021 in su casa in Varberg al costa west de Svedia in le presentia de su familia. Ille habeva 93 annos.

Isto es un grandissime perdita pro nos omnes, pro interlingua e pro le Societate Svedese pro Interlingua, al qual ille co-prendeva le initiativa a establir in 1964. Ingvar Stenström esseva un gigante insubstituibile – un tresor de sapientia, un tresor del historia de interlingua in le qual ille habeva participate quasi desde le apparition de interlingua in 1951, e un tresor de experientia e un fonte (usque ora) inextinguibile de ideas e energia.

Ingvar Stenström habeva un enthusiasmo pro interlingua como nulle altere persona. Certes va dicer que ille esseva interlingua, e ille "parlava interlingua como un nativo", como multes diceva pro honorar le, lo que le dava le supernomine Interlingvar.

Ingvar Stenström esseva un motor pro le diffusion de interlingua, e ille sempre essayava "contaminar" su enorme rete de contactos con le "bacillo de interlingua". Ille inseniava interlingua a milles de studentes in su gymnasio durante le annos, ille appareva in le radio, in le TV, ille scribeva articulos, ille publicava libros, ma ante toto ille esseva le eterne inspirator pro omnes, qui habeva le grande gaudio de incontrar le e collaborar con ille.

Durante le annos recente su vista dispareva poco a poco, ma como sempre Ingvar Stenström continuava luctar, proque ille voleva continuar. A vices ille poteva sonar un poco pessimista, ma post alcun minutas de parlar con alteres in o super interlingua on de novo audiva le fervor in su voce, e ille sonava 20 annos plus juvene – sempre.

Ingvar Stenström participava assi, gratias a su graninfantes, in le 24e conferentia international digital de interlingua in augusto 2021. Il calefaceva le corde e omne veteranos de interlingua audir como le participantes plus juvene se sentiva honorate de esser in compania con e parlar con "le Ingvar Stenström", super qui illes habeva legite tanto, e de qui illes habeva legite tanto.

Felicemente pro interlingua e pro nos omnes, Ingvar Stenström lassa un enorme hereditage de su sapientia in scripto e in parlar (ascolta su contributiones in Radio Interlingua – vide le ligamines in basso – e su registration fluente de su famose manual, probabilemente le manual le plus traducite in tote le mundo). Assi nos pote omnes continuar esser inspirate e enthusiasmate per su parolas, quando nos labora pro diffunder le cognoscentia a interlingua e le uso practic del lingua a ancora multe, multe personas in tote le mundo.

Ingvar Stenström esseva un persona phantastic, e il es incomprensibile que interlingua – e nos omnes – non le ha plus a "flagellar" nos, assi que nos remane sempre active e offensive pro interlingua. Ingvar manteneva su energia e enthusiasmo durante plus que 70 annos, un effortio simplemente impressionante. E ille remaneva ingagiate e active e pensava a interlingua usque su corpore finalmente non voleva plus.

Nos va memorar pro sempre nostre gigante, nostre Interlingvar. Millissime gratias pro tote lo que tu faceva pro nos omnes e tu contribution totalmente exceptional pro interlingua. Le optime maniera de honorar te es continuar le labor que tu faceva.

E multissime gratias a tu car e appreciate familia, a qui va nostre calide pensatas, pro lassar nos omnes prender tanto de tu tempore que nos ha facite.

Que vive le memoria de Ingvar Stenström!

in le nomine del Consilio Executive del Union Mundial pro Interlingua
Thomas Breinstrup
redactor in chef del Panorama in interlingua

(Panorama in interlingua va publicar in su edition de januario-februario 2022 un necrologia plus ample pro honorar Ingvar Stenström)

Ascolta le interview con Ingvar Stenström in Radio Interlingua ab 2008:
Interview con Ingvar Stenström in 2008 (parte 1)
Interview con Ingvar Stenström in 2008 (parte 2)
Interview con Ingvar Stenström in 2008 (parte 3)

Lege le libros de Ingvar Stenström:
Interlingua e su promotion durante 50 annos
Interlinguistica e Interlingua (con Leland B. Yeager)