Multe nove materiales gratuite es continuemente addite a www.interlingua.com. Ecce un rapide supervista.

UMI  Un classico del litteratura chinese, un mini-dictionario in hindi e quatro films que presenta interlingua in 3 minutas.

Isto es le additiones le plus recente a www.interlingua.com. Le sito es actualisate currentemente con nove materiales. Ecce un supervista del additiones recente:

Le Bibliotheca electronic in interlingua es un grande collection sempre plus grande de materiales facile a discargar e studiar – e toto es gratuite. "Nie Xiaoqian" es un historia classic per le scriptor chinese Pu Songling (1640-1715) super un belle phantasma feminin, qui moriva in le etate de 18 annos e esseva interrate in un vetere templo, fortiate per un vampir a damnar le gente. Le scholar Ning Caichen arriva un die al templo, e lo que sole occurrer, non occurre plus. Hu Shenghao ha traducite le novella in un belle interlingua.

Le section con Dictionarios, grammaticas e cursos ha essite supplementate per un version in hindi del "Breve grammatica e vocabulario de interlingua". Le parve brochure contine 400 parolas frequente in interlingua, ci con le traduction in hindi, plus un mini-grammatica. Le brochure existe in numerose linguas que omnes pote esser discargate del section in le formato PDF, facile a apportar o a imprimer. Le section presenta anque numerose dictionarios, grammaticas e cursos preste a usar pro le studio de interlingua.

Le section con Films in interlingua ha addite quatro films que presenta interlingua e su multe avantages brevemente in 3 minutas. Le quatro films ganiava le concurso "Io ama interlingua", arrangiate per le Union Mundial pro Interlingua in 2021. Ora tu pote vider los – e multe altere films in interlingua – facilemente in www.interlingua.com.