Ancora quatro cartas nordic in interlingua
Le gratuite serie de viage, Cartas nordic, invita omnes a quatro nove locationes in le cinque paises nordic. Usa le cartas pro cursos de interlingua.
Ancora quatro locationes ha essite al gratuite serie de viage, Cartas nordic, que tosto attinge 110 motivos ab Danmark, Norvegia, Svedia, Finlandia e Islanda.
Le quatro recente cartas veni ab Frederiksværk (Danmark), Smygehuk (Svedia – le illustration), Kalundborg (Danmark) e Kåseberga (Svedia).
"Cartas nordic" comenciava in 2011, e le viage continua ancora a attractiones e locationes interessante. In cata edition del magazin nordic de interlingua, Actualitates, es publicate duo cartas nordic con un photo e un breve description in interlingua del location. Pois es addite cinque questiones, e le cartas es publicate con un mini-mappa, que monstra le location de cata motivo, in formato PDF in www.interlingua.com/instruction con materiales pro le inseniamento e studio de interlingua.
Le idea es que le photo con le breve texto e le cinque questiones sur un singule pagina A4 functiona como un mini-lection de interlingua e al mesme tempore pote inspirar a experientiar mesme le paises nordic.
Numerose personas ha durante le annos contribuite con photos e textos. Le collection total conta hodie 106 cartas nordic e continua crescer. Nam il ha ancora multissimo a experientiar in le cinque paises.
Viagia mesme con le cartas nordic, e aperi un nove mundo via interlingua.