Ascolta le nove emission de Radio Interlingua directemente in www.interlingua.com o discarga lo como un podcast.

UMIRadio Interlingua  Le 69e emission de Radio Interlingua ha essite publicate. Illo presenta le promotion de interlingua in un grande exposition scandinave e un veniente Dictionario de interlingua, ubi on pote rapidemente controlar le orthographia de un parola in interlingua.

Barbara Rubinstein, presidente del Sociatete Svedese pro Interlingua, narra super le participation in le plus grande exposition de libros in Scandinavia e le resultatos de quatro dies de labor – con un participante extraordinari como parte del equipa. Audi anque super le veniente Dictionario de interlingua, le collega futur del Duden in germano, del Larousse in francese, del Oxford Advanced Learners’ Dictionary in anglese e del Diccionario de la Lengua Española in espaniol.

Le hospite de iste emission de Radio Interlingua es Thomas Breinstrup, redactor del Panorama in interlingua e presidente del Union Danese pro Interlingua.

Radio Interlingua es radio totalmente in le international lingua auxiliar interlingua. Nos essaya includer si multe differente personas como possibile, proque il ha tante bon historias e interessante novas a narrar. Radio Interlingua assi es radio intelligente e radio interessante – e radio in interlingua. E Radio Interlingua es a disposition 24 horas per die, 365 dies per anno directemente in www.interlingua.com/radio o como podcast, isto es files in le formato MP3 que tu pote discargar e audir quando tu ha le tempore.