Duo active usatores de interlingua entra in le Consilio de Administration del Union Mundial pro Interlingua.

UMI  Duo active usatores de interlingua ponera lor energia e ideas in le labor del Consilio de Administration del Union Mundial pro Interlingua (UMI) ab 2025.

Durante le assemblea general del UMI le 14 de augusto, Jacinto Javier "Jay" Bowks (SUA) e José Antonio Vergara (Chile) esseva eligite membros del consilio pro tres annos ab le 1 de januario 2025 al 31 de decembre 2027. Ambes es multo active in le promotion de interlingua e va assi contribuer pro facer interlingua ancora plus cognoscite e usate in tote le mundo. Illes ha longe experientias como usatores active de interlingua e ha elaborate materiales e films pro promover lo.

Al mesme tempore, le tresorero del UMI desde 2006, Alberto Mardegan, se retira ab su posto – ma continua como le aranea e assi le experto technic del sito del UMI, www.interlingua.com. Anque Grzegorz Kondrak se retira como vice-presidente post solmente un anno, proque ille es actualmente troppo cargate de su labor professional, ma ille spera retornar plus tarde pro continuar su labor con interlingua.

Martijn Dekker, vice-secretario del UMI 2009-2024 e consiliero, continua in le Consilio de Administration post haber essite reeligite.

Le Consilio de Administration debe ora distribuer le postos inter se. Usque le fin de 2024 illo consiste de Madeleine Mahé (Francia, presidente), Grzegorz Kondrak (Canada, vice-presidente), Julian Mendez (Svedia, secretario general), Alberto Mardegan (Russia, tresorero/aranea), Carmelo Serraino (Italia, vice-tresorero), Thomas Breinstrup (Danmark, vice-secretario e redactor del Panorama), Barbara Rubinstein (Svedia, consiliero), Martijn Dekker (Grande Britannia, consiliero) e Donald Gasper (Grande Britannia, consiliero).