Nove, grande obras ha essite addite al grande collection de libros digital e audiolibros.

UMI  Currentemente le derecto de autor de litteratura, musica e films expira. Isto significa que le obras es a disposition libere e pote esser i.a. traducite.

Tres classicos del litteratura mundial pote assi esser presentate in interlingua – o al minus le initio del tres. Le redaction de Panorama in interlingua ha traducite le prime paginas de un serie de tal obras cognoscite in interlingua, sperante que illo inspira traductores a continuar le labor e assecurar que le libros essera traducite plenmente in interlingua.

Le Bibliotheca electronic in interlingua pote assi presentar extractos de tres grande libros: "Winnie le Urso de Pluche" per A.A. Milne, "Le sol anque se leva" per Ernest Hemingway e "Le assassinato de Roger Ackroyd" per Agatha Christie. Le tres libros es ben cognoscite e amate per un grande publico in tote le mundo.

Le Bibliotheca electronic in interlingua es un grande collection que offere a omne interessatos de interlingua un abundantia de lectura de qualitate in interlingua, e toto es gratuite. Le e-libros e audiolibros – obras original e traductiones in omne generes e typos de litteratura – es facile a discargar e studiar. le Bibliotheca electronic in interlingua assi es un perfecte methodo pro aggrandir su vocabulario de interlingua e devenir plus bon a usar interlingua. Le Bibliotheca electronic continua crescer.

Explora le Bibliotheca electronic in interlingua - un ample collection de e-libros belletristic e professional, redigite e publicate per le Union Mundial pro Interlingua (UMI). Illo comprehende e-libros e audiolibros, preste a discargar e leger/audir.