Le vice-secretario del Union Mundial pro Interlingua, Piet Cleij, ha 80 annos le 27 de maio.

Piet Cleij, qui es nederlandese, ha habite un grande influentia al labor del UMI e le diffusion de interlingua. De 1991 a 2005, ille esseva le secretario general del organisation e ha assi essite le ancora de numerose labores e projectos, ante toto le arrangiamentos biennal del conferentias international de interlingua, in le quales ille mesme ha participate desde 1989. Sempre ille cerca resultatos.

Ille es le autor de numerose obras lexicographic de interlingua, inclusive le enorme dictionarios nederlandese in duo e tres volumines. Le labor lexicographic le occupa multo, e ille continua colliger parolas e expressiones pro allargar le vocabulario de interlingua. Ille ha essite interessate in interlingua desde 1989 ma es professor emerite de i.a.francese e, in ultra, un eminente photographo e patinator.

In 1990, ille esseva cofundator del Societate Interlingua-Nederland, cuje vice-presidente ille anque es.

Piet Cleij desirava dar spatio a fortias plus juvene e assi deveniva vice-secretario del UMI le 1 de januario 2006. Totevia, ille continua con grande energia su labores pro interlingua, al qual le UMI le es multo grate.