Un jornalista interessate avantiava remarcabilemente le début de www.interlingua.com per su articulo. Isto significava que plure personas debeva dedicar tote lor tempore durante le conferentia de interlingua in Strasbourg in 1997 a establir le nove sito in haste - post que le sol persona con un carta a credito habeva pagate pro le adresse. Le première esseva le die post le fin del conferentia. Isto es le historia exceptional del nascentia de un successo in Internet.

Per Thomas Breinstrup, redactor del Panorama in interlingua


www.interlingua.com - junio 1998 (clicca pro aperir lo in un fenestra separate).

  Pro Paolo Castellina e Frank Pfaff, le dies post le fin del 13-tie conferentia international de interlingua in Strasbourg in 1997 subito habeva un altere contento. Illes non habeva tempore pro parlar e reposar. Illes debeva laborar, gratias a un rapide jornalista francese.

Lunedi vespere, le 28 de julio, un gruppo international de expertos del mundial rete computatorial Internet succedeva obtener in su possession le adresse attractive www.interlingua.com. On lo habeva immediatemente offerite al Union Mundial pro Interlingua. Usatores de Internet debeva ab iste adresse immediatemente obvie poter fornir se mesme de informationes super interlingua, ligamines ab altere sitos domestic de interlingua etc.

Le successo e popularitate de Internet significava que un jornalista del quotidiano alsatian DNA (Dernières Nouvelles d'Alsace) durante un interview con participantes del conferentia demandava, si interlingua es presente in Internet. Ja le die veniente, le 1 de augusto, esseva publicate in DNA in un tirage de 225.000 exemplares le adresse www.interlingua.com – ma sin le mention que ancora durarea alcun septimanas ante que illo esseva active.

Frank Pfaff, programmator professional del SUA, e Paolo Castellina, presidente del Union Interlingua de Helvetia (Suissa), assi usava le dies immediamente post le conferentia in le casa de Paolo Castellina in Suissa pro crear le prime contento del pagina domestic del UMI. Si rapidemente esseva ja alora - poc tempore ante le "popularisation" de Internet - le developpamento del rete. Le successo electronic habeva occurrite ante le début del sito mesme.

Esseva gratias a Jan Årmann, alora presidente del Societate Svedese pro Interlingua e le sol persona in le local con un carta a credito, que le adresse attractive veniva in le possession del UMI.


www.interlingua.com - decembre 1998 (clicca pro aperir lo in un fenestra separate).

"Il es ver que io ha comprate le dominio www.interlingua.com per mi carta a credito durante le conferentia de interlingua in Strasbourg," confirma Jan Årmann.

Durante le conferentia on habeva discutite como fortificar le presentia del UMI in le spatio public, e plure participantes experimentava con Internet. Quando on discoperiva que le adresse www.interlingua.com esseva libere, Jan Årmann poneva su cassa personal a disposition del UMI, e le gruppo poteva - in triumpho - presentar le nove adresse.

Début un die post le conferentia

Le UMI entrava in le WWW (World Wide Web – o: Tela Trans-Terrestre) ja le 3 de augusto 1997, un die post le fin del conferentia in Strasbourg!

"Interlingua – communication sin frontieras" communicava sur le pagina domestic un banda blau obscur con "interlingua" in litteras rubie e le motto del conferentia in litteras jalne. Isto ha desde le conferentia essite le motto official del UMI e de interlingua. Ab le initio il habeva in www.interlingua.com ligamines a materiales informative in anglese, francese, germano, italiano, espaniol, portugese-brasiliano, rhetoromano, svedese, danese e romaniano.

Le menu principal offereva documentos super interlingua, super su movimento (includente tres discursos ab le conferentia in Strasbourg), super discussiones linguistic, e plure exemplos de textos litterari in interlingua.


www.interlingua.com - novembre 1999 (clicca pro aperir lo in un fenestra separate).

Un longe lista dava ligamines a altere sitos in e pro interlingua, on poteva leger partes del magazin official del UMI, Panorama in interlingua, in forma electronic, e al fin il habeva un album de photos – le "Visages del UMI", un servicio que esseva planificate sempre extendite con portraits de interlinguistas ben cognite. On insereva anque un automatismo, assi que on recipe informationes cata vice que le pagina es actualisate.

"Como il es scribite sur le pagina domestic ipse, su actual formato es provisional. De facto, le equipa del responsabiles jam prevideva innovationes technologic e amelioramentos esthetic talmente que iste paginas sia attractive," explicava Paolo Castellina, le prime aranea (o redactor) de www.interlingua.com, postea in Panorama. "On previde cursos interactive, material auditive, un catalogo per le qual comprar libros in Interlingua in maniera facile etc."

Le establimento de www.interlingua.com anque significava nove adresses facile de e-posta pro le presidio del UMI, omnes facilemente recognoscibile e plus official, proque illos fini per @interlingua.com. Antea, e isto esseva in le primissime dies del popularisation de Internet, le adresses electronic private esseva usate.

Le conferentia appunctava un gruppo responsabile pro le sito official del UMI in Internet. Ultra Paolo Castellina e Frank Pfaff, illo consisteva de Florin Sunel (studiante de informatica, Romania), Simona Acsinte (Romania, plus tarde le sposa de Florin Sunel) e Jan Årmann, "le homine con le carta a credito".


www.interlingua.com - april 2001 (clicca pro aperir lo in un fenestra separate).
Presentia in Internet es essential

Frank Pfaff mesme habeva contacto con interlingua per un message scribite in interlingua in un altere gruppo electronic. Ille deveniva curiose, proque ille immediatemente comprendeva toto. Post breve tempore, ille esseva interlinguista active.

"On debe simplemente vider interlingua. Io sempre legeva super interlingua con le addition 'morte'. In Internet, io un die incontrava un curte message ab Stanley Mulaik (SUA). Omne argumento pro interlingua esseva facite per le lingua ipse. Nos debe pro isto usar le Interrete pro interlingua, e nos debe usar interlingua in le Interrete pro facer lo crescer. Le multe possibilitates nos adjuta con isto, e le nove technologia con sono essera ancora un ganio," Frank Pfaff concludeva in un presentation durante le conferentia in Strasbourg.

Paolo Castellina supplementava que "le Interrete significa vita pro interlingua. Isto non es un exaggeration. Le presentia de interlingua in Interrete es essential. Nos debe esser preste exploitar omne possibilitates e usar omne innovationes technologic in le futuro."

Ille notava que le labor e propaganda/information in forma traditional "risca devenir superate e antiquate", pois que le paginas sur Internet es "a complete disposition pro tote le mundo."

"Nos ha testimonios de personas qui ha apprendite interlingua e usate lo pro producer textos in interlingua in solmente un septimana. Il ha personas con poc contactos con le organisationes national de interlingua, qui produce textos numerose," Paolo Castellina constatava con satisfaction.


www.interlingua.com - april 2005 (clicca pro aperir lo in un fenestra separate).
Relanceamento in 2006

www.interlingua.com se developpava, gratias al labor de Paolo Castellina e Emerson José Silveira da Costa, le presidente hodierne del Union Brasilian pro Interlingua. Illes laborava con le designo e le functiones del sito, addeva le possibilitate de cercar, un dictionario in linea a consultar, e tosto veniva anque un columna con novas recente. Iste columna esseva plus tarde assumite per le redaction del magazin official del UMI, Panorama in interlingua.

Le Fundation Bakonyi pro Lingua Universal (FBLU), establite per le ingeniero Stefano Bakonyi pro supportar interlingua, ha - post le prime anno sub le auspicios economic de Jan Årmann - pagate pro le sito insimul con contributiones de plure personas private.

Le 15 de januario 2006 - al Die de Interlingua - le nove sito presente del UMI esseva aperite. Illo contine nove functionalitates e, ante toto, spatio illimitate. Le sito ha desde alora progredite poco a poco. Sempre nove materiales es addite. Le grande projecto de livrar anque audio e video ancora non ha essite realisate in grande grado. www.interlingua.com offere plure files de audio, ma usque ora le capacitate redactional del UMI, que consiste de fortias voluntari, non ha succedite producer anque video. Totevia, isto remane in le planos pro le futuro del sito.

www.interlingua.com ha desde su redesigno in januario 2006 habite plus que 160.000 visitatores.


  
Le nascentia de www.interlingua.com esseva plenmente describite in Panorama, septembre-octobre 1997, immediatemente post le conferentia in Strasbourg le 26 de julio-2 de augusto 1997. Le reporto in supra se basa partialmente super iste articulos. - Clicca pro aperir los in un fenestra separate plus grande.