Le fascinante historia del developpamento de interlingua con portraits del multe personas, qui ha portate lo in avante, se developpa remarcabilemente.

Ingvar Stenström, fil. mag. e secretario del Societate Svedese pro Interlingua, ha finite le manuscripto in le qual ille narra le historia de interlingua per le – usque hodie – 17 conferentias international. Ille, qui mesme es inter le prime pioneros de interlingua, ha usate multe annos perlegente le ancian materiales pro poter scriber super le developpamento que interlingua ha experientiate desde su publication in 1951.

"Cinquanta annos con Interlingua e Union Mundial pro Interlingua" es le titulo de labor del manuscripto, que comprehende plus que 200 paginas. Un comité redactional assistente de Bent Andersen (Danmark), Erik Enfors (Svedia) e Thomas Breinstrup (Danmark) adjuta con le detalios final, i.a. per procurar illustrationes e elaborar parve "cassas" graphic con factos e indices.

Le libro presenta le conferentias de interlingua e le multe participantes e usa los pro placiar interlingua in un perspectiva. On seque le developpamento anque inter le conferentias biennal, ma le peso es ponite al incontros mesme, ubi on – como Ingvar Stenström lo ha dicite multe vices – carga le batterias personal de omne illes, qui cata die labora con e pro interlingua.

Le libro de Ingvar Stenström va sperabilemente esser publicate tosto.

In 2001, al 50-esime anniversario de interlingua, esseva establite un section historic de www.interlingua.com. Ci pecias del historia se collige poco a poco, e nove portraits del personas involvite appare. Le section historic (adresse directe: www.interlingua.com/historia) va continuar, e omnes es multo benvenite a contribuer con memorias, photos, materiales ancian, litteras interessante etc. que pote esser expedite al redaction.