Germano eligite nove secretario general del UMI
Juvene germano, qui parla sex linguas, deveni le nove secretario general del Union Mundial pro Interlingua.
Sven Frank, germano de 33 annos, ha essite eligite nove secretario general del Union Mundial pro Interlingua (UMI).
Sven Frank (le photo), qui es educate hypnotherapista, substitue Petyo Angelov de Bulgaria, qui desde 2006 ha essite le secretario general, ma qui ha essite eligite al posto de presidente de un altere organisation que non le permitte continuar como secretario general del neutral UMI. Pro isto Petyo Angelov, 30 annos, se ha ponite a disposition del UMI, usque on ha trovate un successor. Ille continua como le representante del UMI in Bulgaria.
Sven Frank ha parlate interlingua desde 2002 e parla in ultra anglese, francese, espaniol e svedese - in ultra del germano. Ille arrangiava le prime incontro german de interlingua in julio 2008 in Darmstadt e participava recentemente in le 11me incontro nordic de interlingua in Linköping, Svedia. Ille in ultra essera le fortia principal in le arrangiamento de un planificate conferentia international de interlingua in Germania; le arrangiamento attende un confirmation official, ma le planos es ben progredite e manca solmente un acclaration de alcun detalios ante de esser annunciate.
Le nove secretario general, qui deveniva patre le anno passate e parla interlingua a su infante de tempore in tempore, ha traducite in interlingua plure contos de su copatriotas, le fratres Grimm. Iste libros existe como e-libros que on pote discargar del Bibliotheca electronic in interlingua.
Sven Frank es un persona multo energic con un bon humor. Le energia e dynamica ille va concentrar pro facer le UMI un organisation plus active, plus dynamic e plus visibile in le spatio public. Como secretario general, ille entra in le Consilio Executive del UMI, que gere le affaires quotidian del organisation, que ha membros e representantes in cinque continentes del mundo.
Ille esseva eligite sin competition de altere candidatos.
Pois que non existe - ancora - un organisation national german pro interlingua, Sven Frank ha usque ora essite membro del Union Norvegian pro Interlingua.
Es le prime vice in le historia del UMI que un germano ha essite secretario general del organisation. Le prime secretario general post le fundation in 1955 esseva André Schild, germanophono de Suissa.
Sven Frank gere le instituto ICHP Deutschland in Mannheim e ha scribite anque plure libros professional de hypnotherapia. Ille usa anque interlingua in su labor quotidian.
Factos del Union Mundial pro Interlingua
Le Union Mundial pro Interlingua (UMI) es un institution pro cooperation international concernente interlingua, le lingua international publicate in 1951 per le International Auxiliary Language Association (IALA).
Le UMI esseva fundate le 28 de julio 1955 in Tours, Francia.
Le objectivo del UMI non es exequer o diriger centralmente omne labores e activitates. Le UMI es plus tosto un foro pro le function de facilitar le contacto, communication e collaboration inter le independente associationes, organisationes, individuos e interprisas regional. Le servicios del UMI es dunque variabile secundo circumstantias e possibilitates actual, e secundo lo que eveni sur plano regional.
Le UMI es neutral in questiones politic e religiose.
Le responsabilitate del functiones quotidian del UMI es in le manos de un Consilio Executive autonome con validitate de decisiones per simple majoritate de votos. Le strategia e labor al longe lineas es organisate per le Consilio General, cuje membros es appunctate per le organisationes national de interlingua.
Le Consilio Executive consiste de un presidente, un secretario general, un vice-secretario, un administrator, un aranea (redactor de Internet) e le redactor del magazin official. Le secretario general dirige le affaires currente del UMI e pote delegar cargas specific a assistentes.
Le UMI publica su magazin official, Panorama in interlingua, mantene un servicio de libros que forni litteratura in interlingua e rende disponibile diverse materiales informative e documentative super interlingua, primarimente per su presentia in Internet al adresse www.interlingua.com.