Le Consilio General del Union Mundial pro Interlingua es supplementate per duo juvene bulgaros - le uno es le ex-secretario general del UMI.

UMIStefka YonchevaPetyo Angelov  Bulgaria ha appunctate duo membros al Consilio General del Union Mundial pro Interlingua que fixa le grande lineas in le labor del UMI pro interlingua.

Petyo Angelov (photo a sinistre), 30 annos in novembre, qui se ha justo dimittite como secretario general del UMI post vider complicationes in mantener parallelmente le presidentia de un organisation bulgare que non es neutral in questiones politic e religiose como le UMI es, assi continua como consiliero general e essera accompaniate per Stefka Yoncheva (photo a dextere), 28 annos, qui ha participate in plure conferentias de interlingua.

Illes ha essite eligite per le Academia Bulgare pro Interlingua que es le representante de interlingua in Bulgaria. Stefka Yoncheva substitue Milen Shopov.

Lege le portraits del duo nove consilieros in le edition septembre-octobre de Panorama, que va apparer intra breve.

Factos del Union Mundial pro Interlingua

Le Union Mundial pro Interlingua (UMI) es un institution pro cooperation international concernente interlingua, le lingua international publicate in 1951 per le International Auxiliary Language Association (IALA).

Le UMI esseva fundate le 28 de julio 1955 in Tours, Francia.

Le objectivo del UMI non es exequer o diriger centralmente omne labores e activitates. Le UMI es plus tosto un foro pro le function de facilitar le contacto, communication e collaboration inter le independente associationes, organisationes, individuos e interprisas regional. Le servicios del UMI es dunque variabile secundo circumstantias e possibilitates actual, e secundo lo que eveni sur plano regional.

Le UMI es neutral in questiones politic e religiose.

Le responsabilitate del functiones quotidian del UMI es in le manos de un Consilio Executive autonome con validitate de decisiones per simple majoritate de votos. Le strategia e labor al longe lineas es organisate per le Consilio General, cuje membros es appunctate per le organisationes national de interlingua.

Le Consilio Executive consiste de un presidente, un secretario general, un vice-secretario, un administrator, un aranea (redactor de Internet) e le redactor del magazin official. Le secretario general dirige le affaires currente del UMI e pote delegar cargas specific a assistentes.

Le UMI publica su magazin official, Panorama in interlingua, mantene un servicio de libros que forni litteratura in interlingua e rende disponibile diverse materiales informative e documentative super interlingua, primarimente per su presentia in Internet al adresse www.interlingua.com.