Humorista eligite nove presidente de Interlingua Italia.

Roberto Capuzzo
Duo nove presidentes - le american e le italian de interlingua. Es Roberto Capuzzo a dextere...
UMILe organisation Interlingua Italia ha eligite nove presidente, post que Alberto Mardegan – qui anque es le administrator del UMI – esseva empleate per le fabricante de telephonos mobile, Nokia, in Finlandia.

Roberto Capuzzo es active in usar interlingua publicamente e es le originator detra “Le Oculo Interlinguistic”, un sorta de periodico in interlingua publicate in Internet con multe humor - reflectante le humorista Roberto Capuzzo.

Post un carriera fulminee como spermatozoon in 1949, ille initiava le studio del linguas (latino e anglese) in schola in le 1960s. Su matre es fluente in latino, e desde ille tempore Roberto Capuzzo appella latino su "lingua-matre". In anglese ille es adjutate per un soror (monacha) maltese supernominate "Ruler Britannia" pro su methodo de inseniamento basate super le regula de designo. Fortunatemente (pro anglese) in 1962 arriva le Beatles e le Rolling Stones e face plus sympathic iste lingua.

In le 1966 Roberto Capuzzo scribe un poema satiric in rima basiate in re le director de su lyceo, que le procura le laudes del critica e le suspension scholastic per 15 dies. In 1969 ille discoperi Europa e le europeos (femina) per un viage a Paris (Sylvie), London (Mabel), Scotland (Susan) e Hannover (Barbara). Post trenta annos de enoio, durante le quales ille deveni ingeniero electronic, Roberto Capuzzo se sposa, gania duo filios, tres canes, dece cattos e viagia in tote le mundo pro labor, e in 2002 ille incontra Interlingua (in internet). In 2005, ille es un del socios fundator de Interlingua Italia, e in le 2008 ille es ora eligite presidente del organisation.

Actualmente Roberto Capuzzo vive proxime a Ferrara, un citate medieval in le nord-est de Italia ubi on parla un dialecto gallo-roman. Desde 1987, ille es cognoscite in interrete como "robocap".

Interesses personal: Aikido, blues electric, opera baroc, rugby, vela, linguistica indo-europee, informatica.

Activitates professional: post un carriera managerial in Digital e in IBM, hodie Roberto Capuzzo es le proprietario de un parve societate de consultation in Business Innovation.