Le stock de litteratura del Servicio de Libros ha essite comprate pro le UMI. Tote le moneta del vendita ora supporta le diffusion de interlingua.

UMIServicio de Libros UMI  Gratias a un donation generose personal le Union Mundial pro Interlingua ha comprate tote le stock de libros del Servicio de Libros que durante quasi 40 annos ha vendite litteratura in interlingua.

Le Servicio de Libros UMI esseva fundate in 1972 per le imprimitor professional nederlandese Frits Goudkuil (1917-2007), qui assi voleva promover interlingua per litteratura professional e belletristic. Desde alora le firma ha imprimite e vendite un grande parte del litteratura de interlingua, i.a. per le catalogo Bibliographia de Interlingua que appareva cata anno usque 2002. Le scopo esseva assecurar que le libros sempre esseva accessibile pro le publico.

Quando le sanitate de Frits Goudkuil ante cinque annos deveniva pejor, le UMI assumeva le vendita del libros, usante ordines in Internet e le possibilitate de pagar immediatemente per carta a credito. Le stock de libros esseva movite, e Martijn Dekker e Piet Cleij, ambes de Nederland, assumeva le carga de expedir le ordines.

Ma le situation con duo proprietarios del Servicio de Libros non esseva practic, e pro isto Piet Cleij, qui anque es le vice-secretario del UMI, ha financiate que le UMI ha comprate tote le libros del filios de Frits Goudkuil, un de illes es Frank Goudkuil, qui hodie continua le imprimeria de su patre, Drukkerij Goudkuil, que ancora imprime Panorama. Esseva le grande idea de Frits Goudkuil unir le fortias del varie magazines in interlingua e crear un magazin official plus grande. Isto se realisava con Panorama in januario 1988.

Gratias al donation gentil de Piet Cleij, le Servicio de Libros es ora un parte total del UMI, e tote le moneta generate per le vendita del multe libros in le catalogo del Servicio de Libros UMI va esser usate pro producer nove editiones e reeditiones de libros que es exhaurite. Le resto del profito va supportar le labor informative del UMI de diffunder le cognoscentia a e le uso de interlingua in tote le mundo.

Lege anque:
 Litteratura in interlingua cresce multo
Duo nove libros in interlingua
Enorme dictionario svedese sur papiro
Mammut no. 3 publicate
Nove dictionario francese con 51.000 parolas