Le fascinante historia del developpamento de interlingua con portraits del multe personas, qui ha portate lo in avante, ha essite publicate.

  Le prime libro comprehensive del historia de interlingua durante plus que 50 annos ha finalmente apparite.

Post quasi dece annos de labor, le secretario del Societate Svedese pro Interlingua, fil. mag. Ingvar Stenström, presenta su "Interlingua e su promotion durante 50 annos". In 270 paginas A5, plen de illustrationes rar, le libro presenta un historia del Union Mundial pro Interlingua (UMI) in le forma de un narration personal basate sur le recerca e re-lectura de milles de paginas de documentos, litteras e magazines.

Le autor es un del pioneros de interlingua. Ingvar Stenström incontrava le lingua ja in 1952 - un anno post le publication del prime libro, le "Interlingua-English Dictionary". Ille assisteva al fundation del UMI in 1955. Le libro da un vista fascinante a in un mundo de pioneros, qui durante plus que 50 annos ha laborate intensivemente pro lor conviction que le mundo besonia un lingua international neutral pro realisar le belle pensata, que tamben ha devenite le motto de UMI: "Communication sin frontieras" - communication pro crear comprension inter individuos e inter nationes.

Le autor describe tote le conferentias, presenta le discussiones e themas a ille vices actual, describe le multe personas interessante qui participava, e ha reflexiones de tote lo que ha passate pro diffunder le cognoscentia a interlingua e le uso practic del lingua.

Al fin, il ha un appendice con notas biographic de personas active pais post pais, un lista complete del executivos del UMI, un lista del conferentias international de interlingua, un lista del organos de/pro interlingua e de abbreviationes commun.

"Interlingua e su promotion durante 50 annos" pote esser ordinate e pagate directemente del casa editorial Lulu.com. Le precio intra le Union Europee es 18,29 euros (inclusive le expedition e porto postal). Le porto a altere paises como Norvegia e Russia es plus alte e le porto al SUA probabilemente es plus basse.

Ordina le libro ci: Lulu.com: "Interlingua e su promotion durante 50 annos"

Lege anque:
Grande historia de interlingua (2008-06-22 17:33)