Felice Natal e bon Anno Nove 2010!
Un carta postal electronic del Consilio Executive del UMI.
In poc septimanas fini 2009 - un anno de novo multo active pro le promotion de interlingua in tote le mundo.
Le 18ve Conferentia International de Interlingua in Kirchheimbolanden, Germania, deveniva sin dubita le culmine del eventos que felicemente ha essite numerose. Le numero de articulos in le pressa anque ha essite grande, e le litteratura in e super interlingua ha crescite remarcabilemente. Multissime nove titulos ha apparite in le Servicio de Libros UMI e Lulu.com - dunque supporta le diffusion de interlingua per comprar alcun titulos ja hodie, es facile proque on ordina e paga directemente per Internet.
In le differente paises, le nivello de activitate varia. Alcun organisationes national, representantes e individuos es multo active, alteres es invitate a sequer lor exemplos e dar un mano (preferibilemente duo) pro assecurar que sempre plus de personas es informate super interlingua e comencia apprender e usar lo.
Gratias special a omne illes, qui como professores de interlingua arrangia cursos, assi que interessatos ha le possibilitate apprender le lingua per conversation e sub instruction competente. Le UMI es grate que iste cursos, cafés e vesperes de interlingua continua - alcunos ha existite durante quasi 20 annos.
In 2010, le activitates debe devenir ancora plus numerose e interlingua assi multo plus diffundite. Nos spera que vos omnes va adjutar. Le prime passo es pagar le abonamento a Panorama in interlingua, le international magazin de novas. Per favor, considera seriosemente devenir abonato digital pro assi reciper lo in un version electronic directemente in tu cassa postal electronic. Le avantages es multes: Tu lo recipe plus rapidemente, illo es in colores, tu adjuta sparniar CO2 proque le magazin non debe esser imprimite e expedite, e le abonamento costa minus que le version imprimite sur papiro.
Le Consilio Executive del Union Mundial pro Interlingua (UMI) invia le optime salutes e bon desiros a omne membros e lor familias de un felice Natal e un multo bon e successose Anno Nove 2010.
| Barbara Rubinstein presidente |
Sven Frank secretario general |
Martijn Dekker vice-secretario |
| Alberto Mardegan tresorero-administrator |
Thomas Breinstrup redactor del Panorama |