Le 15 de januario 2010 es de novo le Die de Interlingua. Prepara alcun activitates pro facer interlingua plus cognoscite - e usate.

UMI  Omnes, qui apprecia interlingua como lingua, es incoragiate dar un mano - o preferibilemente duo - le 15 de januario 2010. Iste data es le Die de Interlingua.

Le idea del Die de Interlingua es usar le 15 de januario pro multe activitates e actiones - parve o grande - pro promover interlingua in tote le mundo. Isto pote esser in forma de un discurso in un club, un mini-curso de interlingua, un arrangiamento informative al bibliotheca local, distribution de brochures informative al vicinos e al amicos, un interview con le radio local o le jornal local, un message in o super interlingua in un foro in Internet - o omne altere initiativas pro mentionar interlingua publicamente, assi que plus de personas cognosce le lingua.

Le 15 de januario 2010 es le 17me vice que le Die de Interlingua deveni un realitate. Iste die es le die, ubi le prime libro in interlingua, le "Interlingua-English Dictionary", esseva officialmente registrate, quando interlingua esseva publicate in 1951.

Contacta tu organisation national, si tu besonia brochure informative pro tu activitates, e memora informar le redaction del Panorama in interlingua super tu initiativas. Tu pote scriber al redaction electronicamente al adresse panorama@interlingua.com.

Bon successo al Die de Interlingua!

Lege plus: Le die mundial pro interlingua