Un description plus detaliate del cargas del representantes de interlingua es preste.

UMI Le representantes de interlingua in tote le mundo debe esser plus visibile e plus active.

Pro isto le Union Mundial pro Interlingua (UMI) ora ha elaborate un lista del cargas e responsabilitates que on expecta del organisationes e individuos qui ha essite appunctate representantes national del UMI.

"Nos desira que interlingua deveni plus visibile, e que le representantes sape lo que le UMI expecta de illes - e inversemente. Con le lista nos spera anque inspirar le representantes e assecurar que le collaboration international inter le multe representantes e le UMI deveni sempre melior, e que nos informa le unes le alteres super nove activitates e experientias que pote diffunder interlingua e le uso de illo ancora plus," dice Barbara Rubinstein, presidente del UMI.

Un puncto importante del description es que le reportar de initiativas e activitates es fortificate. Isto va facilitar plus de collaboration inter le paises, e il va devenir plus facile coordinar initiativas parallel in plure paises.

"Il es nostre spero que le nivello de activitate assi va crescer, e que le resultatos devenira plus numerose - e plus bon," dice le presidente del UMI.

Le description del cargas esseva elaborate per le Consilio Executive del UMI e approbate per le Consilio General del UMI.

Lege le documento "Representation del Union Mundial pro Interlingua" ci.