Bibliotheca electronic in interlingua

UMI  Sex nove e-libros, sex episodios de bandas designate e le prime audiolibros ha essite addite al gratuite Bibliotheca electronic in interlingua.

Le Bibliotheca electronic in interlingua es un grande collection de e-libros e altere e-materiales gratuite, un collection, que cresce sempre. Ora il ha ancora plus a leger - e audir.

Popeye e le papa del soldato Švejk

Le diligente traductor italian, Onofrio Notarstefano, es le maestro detra le traductiones de sex breve contos per le satirico e humorista tchec Jaroslav Hašek (1883-1923), cognoscite ante toto pro su novella mundialmente famose "Le bon soldato Švejk". Le serie comprehende "Le parve besonio e le justitia", "Le processo a Ham, filio de Noe", "Conto super le Cimices", "Le boteca del feretros", "Summario de un romance criminal" e "Un scena-reclamo". Omne novellas es de octo-novem paginas A4.

Le famose marinero Popeye, qui ama le spinace que le face fortissime, naturalmente anque existe in interlingua, de novo gratias a Onofrio Notarstefano. Sex episodios - cata uno de duo paginas - pote esser discargate pro le bon humor.

Ascolta le textos: nove audio

Le Bibliotheca electronic in interlingua ora introduce audio. Ascoltar le linguage sin o con le texto ante le oculos es un bon maniera de esser lingualmente inspirate. Le audio es presentate in duo formatos: MP3 e OGG, assi que on pote discargar le historias e ascoltar los in su sonator de MP3 o le computator.

Le prime textos audio es duo contos ab le charmante libro "Le Trolls" per le poeta laureate svedese Sven Collberg: "Le tres Capros Cruse qui voleva ir al cabanas alpestre a fin de ingrassiar se" e "Le puerettos qui incontrava le trolls in le silva del valle de He". On pote comprar le libro ci in linea.

Le detective brasilian "Ed Morte - Le Trappa" ora anque pote esser ascoltate. In avantia on pote discargar le e-libro, traducite per Emerson José Silveira da Costa.

Selige tu favoritos - gratuitemente

Le Bibliotheca electronic in interlingua es pro omnes, qui apprecia interlingua e vole approfundar se plus in le lingua. Le bibliotheca es un collection de e-materiales (libros e audio), publicate per le Union Mundial pro Interlingua in www.interlingua.com/e-libros. Tote le materiales es gratuite. On pote discargar los a su proprie computator o leger los directemente sur le schermo. Tote le libros es in le formato PDF, e si on non desira leger los sur le schermo, on pote mesme imprimer los sur papiro.

Visita le Bibliotheca electronic in interlingua e cerca mesme tu litteratura favorite.

Lege anque:
Multissime libros pro le estate in le radio